 Online |
 |
|
Guests: 2, Members: 0 ... most ever online: 46 (Members: 0, Guests: 46) on 21 Jul : 08:47 Members: 844 Newest member: croosby3yw
|
|  |
|
|
| |  | | Posted bytema -Sunday 28 September 2008 - 14:03:16 | | ORISSA STATE-A TIHDUHDAHNA THLENG MEK REPORT TLANGPUI - Rev. R. Lalrinsanga, Secretary, KHC
Unau duh takte u,
Vawiinah hian kan unau ringtu puiten Orissa state leh India ram hmun danga Kristian an nih avanga tihduhdah an tuarna tuarpui tur leh tihduhdah kan duh lohzia lantir turin kan lo pung khawm a ni a. He Peace Rally hmangtu zawng zawngte Lalpa Isua hmingin chibai ka buk a che u.
Sakhaw zalenna ram tia kan sawi thin India ram, Orissa leh state thenkhata sakhaw pawl tlem zawk, Kristiante dikna chanvo leh Religious Right chhuhsak a, rawng tak taka an nunna laksak leh sawisak an nih avanga Peace Rally hman a ngai hi a pawiin ava lungchhiatthlak em! Tihduhdahna tuar mekte thinlung tak takin kan tuarpuiin an tan kan tawngtai a. Tiduhdahtute pawh an thiltih sual tak kalsana Pathian lam an hawi kan duh em em a, an tan kan tawngtaisak bawk a ni.
Vawiina Peace Rally kan hmanna chhan ber, Orissa State-a tihduhdahna thleng mek chanchin a kimchangin sawi hman ni lo mah se a tlangpui lo tarlang ila.
Orissa state-ah hian Hindu firfiakte hmalakna avangin Kristian tihduhdahna hi a thleng fo va, kum 1999-a Missionary Graham Staines-a te pafa rawng taka halhlum an nih pawh kha khawvel pum hriat a ni a. Hemi avanga Kristian tihduhdah duh lohna Protest Day MKHC hmalaknaa February 1, 1999-a Mizoram pumah kan neih pawh kha kan la hre \heuh awm e. Kum kal liamta 2007-ah pawh khan khawvel puma Kristianten kan K<t pawimawh, Krismas hlim taka kan hman laiin Kandhamal District, Orissa state-ah chuan December 24 leh 25-ah Hindu firfiak, VHP hovin engmah pawisawi lo Kristian-te chu ralthuam chi hrang hrang hmangin an bei a, eng emaw zat nunna laksak an ni a. Kristian sakhaw hmun serhte chu tihbawrhbansak an niin, Biak In tam tak leh chenna in tam tak hal ralsak an ni a.Chuvang chuan nikum 2007 Krismas hun pawh kha hlimna ni atan hmang ve thei lovin, lungngaihna leh mittui tlakna ni atan an hmang a ni. Chutia Hindu firfiakten nikum Krismas laia nasa taka kut an thlakna hliam pawh kha a la dam fel hmain Orissa Kristiante chungah tihduhdahna nasa zawk a thleng leh ta. He tihduhdahna lo irhchhuahna bul ber nia lang chu, VHP hruaitu Swami Laxmananda Saraswati leh a thian palite August 23, 2008 Inrinni tlai dar 7:30PM vela Maoist hel pawl nia hriatten AK-47 rifle hmanga an kahhlum vang a ni a. Swami Laxmananda hi Kristian tihduhdahnaa hmahruaitu leh nasa taka bawng talh dodaltu a ni a. Maoist pawl, People’s Liberation Guerilla Army (PLGA) ten chanchinbu hmanga an thah anih thu an puan chung leh Police lam chhuinaah pawh Maoist helho thah ngei nia an hriat hnuah pawh VHP hote chuan Kristian-te thahah puh luiin, an hotupa phuba lakna atan tiin Kriatian-te chungah kut an thlak lui ta a ni.Thah a nih tuk August 24-ah mipui an fuihpawrh theih nan Swami Laxmananda Saraswati ruang chu Kandhamal District chhungah VHP hoten tlan kualpuiin tlai lamah halral a ni a. VHP hruaitu Mr. Pravin Tagodia hovin Swami sunna inkhawm hi an nei bawk a. Chutia inkhawm an neih zawh veleh chuan Hindu ho an fuihpawrh tam takte chu a zan a zanin ralthuam chi hrang hrang leh petrol leh khawnvartui etc. te kengin Kristiante chenna khua leh Biak In tihchhiat tum leh thah tur zawngin an tlan darh ta a. A tuk August 25, zing khua a lo var chuan Kandhamal District hmun hrang hrang atangin Kristiante chenna in leh Biak In tam tak hal a nih thu te, engemaw zat thah an nih thute a darh ta chuai chuai mai a. Dan leh thupek kengkawhtute leh thuneitute lahin heng Kristian pawisawi lote nasa taka sawisak an ni hi an thlavang duh lovin ngawi rengin an thlir a, thlavang hauhtu nei lovin Kristiante chuan an sepui ruah tuar ta ringawt mai a ni. Tihduhdahna chu a hluar chho ta zel a, chanchin kan hriat theih chinah tun dinhmuna Kristian-ten Orissa State chhunga tihduhdahna an tuar dan tlangpui chu hetiang hi a ni:1. Tihduhdahna thlenna District zat : District 14 (out of 30 Disrticts).2. Tihduhdahna thlenna khaw zat : 300 aia tam.3. Tihduhdahna tuar mek zat : Mi 50,000 (Singnga) aia tam. 4. Ramhnuaia la biru mek zat : Mi 40,000 (Singli) vel.5. Sorkarin Refugee Camp a siama awm zat : Mi 12,000 ( Singkhat Sanghnih) vel6. Private Camp leh Home-a awm zat : Mi 1,000 ( Sang khat) vel.7. Thi hriatchian chin (Confirmed dead) : 45 (Sawmli panga).8 Tihduhdah avanga hliam tuar za : 18,000 (Singkhat sangriat) vel ni a hriat a ni a,a tam ber chu ramhnuaiah an la biru mek a ni.9. Kristian chenna in tihchhiat sak zat : 5,000 (Sangnga) aia tam. 10. Biak In hal leh tihchhiat zat : 400 (zali) chuang.11. School leh College beih leh tihchhiat zat : 11 (Sawmpakhat).Orissa State-a Kristian-te tuar dan report hi chi hrang hrang a awm a, tlema report lo uar hrette pawh an awm nia sawi a ni a, he report kan han siam hi rin tlak leh belhchian dawl nia kan ngaih ber atanga lak a ni.Orissa-a Kristian-te tuar dan hi a rapthlak hle a, Romania rama Kristian tihduhdah vang laia an tuar dan ai khan a nep chuang awm lo ve. An tuar dan rapthlakzia kan hriatthiam theih nan, tlemte han tarlang ila:1. Nula Rajni Majhi chu Baragarh khuaah a nung chunga hal hlum a ni a, ani hi tun tum Orissa tihduhdahnaa halhlum tawk hmasa ber nia hriat a ni. 2. Pu Ishara Digal kum 45 mi, Malipada khua ami chu a nupui mit hmuhah chan sawm vek a ni.3. Pastor Kumuda Bardhan chu Mukundi khua, Gajpat District-ah hal hlum a ni.4. Pu Rasananda Pradhan, a taksa zeng (paralyze) chu a nung chungin a inah hal hnan a ni.5. Nula Manini Digal, School naupang chu Baliguda khuaah a nung chunga hal hlum a ni.6. Pi Kamalini Naik, kum 25 mi nau pai lai chu Baliguda khuaah chan sawm vek a ni a, a fapa kum khat leh a chanve mi an that bawk a ni.7. Pastor Akbar Digal-a chu Tatohma khuaah chan sawm veka hal ral zui a ni. Orissa state-a Kristian tihduhdahna hi a la kal zela, state pum puia Kristiante chu hlauhna leh thlaphanna chhumin a la chim reng a. Orissa State bakah pawh tihduhdahna hi a darh zau zel a, Karnataka State leh Madhya Pradesh State-te pawh a kangkai ta mek a ni. India ramin a ropuina leh mawina ber, hnamtin leh sakhawtin zalenna ram anihna a hloh mek hi a pawi em em a ni. Tun atang chuan Sakhaw Pawl tlem zawk leh hnam tlem zawkte nekchepa insawisaknate hi lo reh tawh sela. India ramah hian hnam hrang hrang leh sakhaw pawl hrang hrangte hi intibuai lo leh zalen takin cheng ho tawh ila tih hi MKHC chuan a duh em em a ni. A tawp berah chuan Kristian-te chunga tuarna thleng hi lungchhiat thlak hle mah se a thlawnin a awm ngai lo tih hre thar leh ila. Tertulliana’n, "Martar-te thisen chu chi (seed) a ni a, a luanna hmun apiangah kohhran a tiak zel thin," a tih angin heng kan unau tuartute thisen hi leiah a luangral mai dawn lo va, an thisen hian an dam lai aiin a tiduhdahtute thinlungah thu a la sawi ring zawk ngei ang. Chu tuarna thleng mek chuan vawiinah hian keini Mizorama ringtute pawh hi rilru hmunkhatin min ko khawm a nih hi. Kan unaute chunga tuarna thleng mek hi ngawihsan mai lovin, rinawm tak leh chhel taka Lal Isua tan an din zel theih nan te, Pathian thlamuanna leh tanpuina an dawn zel theih nan te, bang lovin i tawngtai pui ang u. Tin, tiduhdahtute pawh anchhia lawh mai lovin, in lamleta an thiltih tha lo takte bansan a, Lal Isua an lo rin theih nan te, tihduhdahna hi a lo tawp a, India ram hi sakhaw zalenna ram anih zel theih nante van Pathian auvin theihtawpin i tawngtai zel ang u.
|  |
|
| | |
|
 |
Poll |
 |
|
| |
|
|
|
|
Chatbox |
|
|
| |
You must be logged in to post comments on this site - please either log in or if you are not registered click here to signup
...:
Oznial
:...
02 Sep : 00:53
El awl el kan thlak let thar chiah zawk a ni e ..ning tur em pawn i la awm lo nem
...:
Ramchhana
:...
01 Sep : 12:27
Theme chu thlak tawh teh u
...:
Oznial
:...
30 Aug : 00:03
Ni e.
...:
admin
:...
29 Aug : 09:15
Ni chiah - poll tur pawh hi han submit ula- :D
...:
Ramchhana
:...
29 Aug : 07:03
Ni e misual site anga thu ho deuh2 a chat ai chuan tha khop ang
...:
Sadbutt
:...
29 Aug : 04:53
Poll hi Kolasib hmasawnn lam hawi....e.g. Field, Kawng tha, Dr.Specialist mamawh cc, etc.
...:
Oznial
:...
29 Aug : 01:57
i reh fe zawk
...:
admin
:...
28 Aug : 12:39
khonge pu muanpuia hi ava reh ve
...:
Oznial
:...
28 Aug : 11:46
i dam maw Lalmam
...:
Singson
:...
28 Aug : 10:53
aw pu ozz a sir kil li kha kan pot dehe dawn lawn
|
|
|
|
|
Counter |
|
|
| |
|
This page today ...
total: 49
unique: 27
This page ever ...
total: 5972619
unique: 5925122
Site ...
total: 10915700
unique: 10771175
|
|
|
|
|
RSS Feeds |
|
|
| |
Our news can be syndicated by using these rss feeds.
|
|
|
|
|
